West Garo Hills, Baljek Agal songo Muga jo∙ongni bitiponiko kildingko bikotaniko September 14 oni 28 tarikona skie on∙angaha. Ia training program ko Meghalaya State Skill Development Society (MSSDS) ni dakchakanichi WGH a·jani Sericulture office ong∙atangaha.
Sal 14 na ong∙atgipa ia programo o kilding bikotani, sringani aro name dol∙e donaniko skie on∙angaha. Ia programo skie ra∙na Baljek Agal aro wilwilao donggipa songrangoni re∙bae bakko ra∙angaha jeon sak 40 mangde ma∙giparang ong∙a. Uamangna muga jo∙ongko tangkame rakkianiko aro bon∙changatgija dake cha∙ani cholrangko skie on∙angaha. Garo Hills o nambatgipa muga kildingrangni gisepo Jengjal a∙jaba damsa ong∙a aro uamang iani gimin name ma∙sijae man∙gnirangko gimaataniona sokata ine ma∙sina ma∙naha. Mongsongbate Assam na bitiprangko dam komie palanio namen rusianiko ra∙baenga.
Training ni bon∙kamgipa salo a∙jani Additional Deputy Commissioner Mary Lisa K. Marak mongsonggipa sokgipa ong∙e, trainingo bak ra∙gipa manderangna certificate rangko on∙angaha. Ia skie on∙ani program ko ong∙atanichi muga kildingoniko an∙tangtangni changa sapa gita ba∙rarangko tarie pale sim·e janggi tangna cholrangko on∙an baksana a∙jana rasongko ra∙bagipa ong∙gen ine ua trainingo bak ra∙giparangko didie aganangaha.
