Gital C&RD Block rangko on·chinagita dingtang dingtang dolrangoni aro politics ni dilgiparangni ge·bonga dorgasto galatanirangko Community and Rural Development ni Minister Abu Taher Mondal man·soaha ine mijal salni bako koborna parakataha.
Block gitalrangko dabianirang sokbagenchimoba, sorkarinigita gital block rangko kulie on·ani maming janapanirang dongkuja ine Mondal aganangaha. Sorkarini gital block rangko kulina ge·etanirang dongkujaenganiara, dongsogimin block rangko man·a dipet ta·rakale name chalaianiko nichengesa gital block rangko kulina chanchianggen ine ua aganangaha. Gital block rangko kulie on·aniara nanganirangko nigrike bon·changatgija ka·ani kam ong·a jeon dingtang dingtang constituency rangni palo dilgiparang block gital rangna janapaniko sorkari man·soani ja·man kulie on·a chanchianiko dakanggen ine Mondal parakataha.
Sorkarini mongsonggipa miksonganiara manderangna administration ko sepangbatatna jotton ka·ani ong·a maina songadamni manderangna block office namen gamchatbegipa aro dakchakaniko on·a amgipa office ong·a ine Mondal agandapangaha.
