Agia-Medhipara-Phulbari-Tura (AMPT) rama jean Agia oni Phulbari ona re·na jakkalgipa ramako National Highway ong·atna kragipa ong·a ine Cabinet Minister Abu Taher Mondal mijal salo u·iataniko dakangaha.
Ia ramani bidingo Public Works Department (Roads) ko jako ra·gipa Deputy Chief Minister Prestone Tynsong baksa golpogrikaniko dakangaha aro ia rama ko National Highways Authority of India (NHAI) baksa bakrime National Highway ong·atnagita jako ra·e kamko ka·na Tynsong ka·donganiko on·angaha ine Mondal aganangaha.
Agia oni Phulbari ona re·na jakkalgipa 75 km mangnigita bakrogipa ramako dilbridake tarina niksamsoaniko parakan baksa 127(B) extension ine biming dona nangnikanikoba Mondal janapangaha. Ia rama International border ona dakanggipa ong∙ani gimin National Highway ona tang∙doatako man∙a kraa aro a∙songni skotong songjinma Delhi onaba re∙na man∙gipa rama ong∙a. Unbaksana Assam aro Meghalaya a∙dokni skotong songjinmaonaba re∙na jakkalgipa ramaba ong·a ine Mondal agandapangaha.
