Sima arirango meligrikgijani bidingo gnigipa phase nigita golpogrikaniko Assam aro Meghalaya a·dokni Chief Minister rang Guwahati songjinmani Khanapara o tom·aniko dake dam dok meligrikgijagipa songrangoni bidingo bon∙kame ja∙kurangko de∙nagita adita chanchirimaniko dakangaha.
Ia tom·anio skanggipa phase o Memorandum of Understanding (MoU) ko soi ka∙gimino pangchake dol gni sorkari bon∙kame dam dok sima arirango donggipa songrangni meligrikgijaniko naljokatna man·a gita chanchirimaniko dakangaha ine Chief Minister Conrad Sangma koborna u·iataniko dakangaha. Assam aro Meghalaya a·dok bakrime nirok sandianiko dakani ja∙man dam dok biaprangko Hahim sector ni gita sima ariko bon∙kame namgrikatna chanchianiko dakangan baksana re∙baenggipa December 31 tariko chu∙sokatgen aro dam gittam biaprango meli nangrimataona ra·bana bang·jaengaha ineba Sangma aganangaha.
Block 1 (Khanduli) biap ni bidingo niam retirango pangchake chanchirimaniko dakangon, dam gni a·dokni sorkari ua jolo songdongenggipa manderangni namgnina CRPF dolrangko sima arirango donatna tik ka·angaha aro re∙baenggipa October jani bri gipa antio Khanduli biapko a·dok dam gnini Chief Minister rang nirokaniko dakna gitaba tik ka·angjolaha ine Sangma u·iatangaha.
