Da·al salni bako a·dokni Education Minister Rakkam A. Sangma, NEHU Tura campus o October 3 oni 5 tarikona ong·atenggipa Megha Start-up Expo 2023 ko oprake on·angaha. Ia salgittamna ong·atenggipa expo ko NEHU, BIRAC’s BioNEST Bio-Incubator Facility, PRIME Start-up Hub aro BRTC KIIT-TBI, Odissa bakrime ong·atangenga.
Ia expo o biltangchi tarigipa bosturang jekai sol·a repa, wata chenga, sika koa, rokomanti cha·ani ringanirang, ge·e game man·gipa biterang, ma·manti kolrangko jakkale badingenggiparang aro gipin bosturangko mesokangan baksa pala sim·anikoba dakangenga. Ian dingtangmancha changa sapaniko jakkale biltango dake cha·giparangna uamangni bading chiwalaniko tang·doatna aro uamangni tarigimin bosturangko manderangna mesokna man·agita dakchakna miksonge a·bachengatenga.
Programona mongsonggipa sokbagipa a·dokni Education Minister dingtang mancha NEHU ni BioNEST Facility ko uamangni mikkangchi niksamsoe kam ka·anina demittelangaha. Unbaksana ua ge 75 dokkanrango nape uamangni bading chiwalaniko namdapatna bakrimpaaniko on·angan baksa cholrangko ma·sie ra·e sorkarioni dakchakaniko on·a nie ra·angjolaha.
Programko oprakani somoio Rural Development and Agricultural Production (RDAP) department ni Head & Associate Professor Dr. B K Mishra, West Garo Hills NABARD ni DDM KITT Miller Sangma, NEHU ni Vice-chancellor PK Shukla, R&D aro KITT University ni Director General, Odissa KITT-TBI ni CEO Dr. Mrutyunjay Suar, BIRAC New Delhi Technical Department ni GM & Head Dr. P K S Sarma, Prime Start-up Hub ni Program Head Aditya Sen expo ko a·bachengatan salo dongpae bakko ra·angaha.
