Re∙anggipa 2023 Assembly election na puonao Congress dolni ong∙na kragija sirikaniko niangpilna aro mikkangchi re∙mikkangani bidingo party ni Working President Deborah Marak aro Gambegre MLA Saleng Sangma, Tura Congress Bhawan o tom∙bimonge chanchirimangaha. Congress doloni pilak committee aro block rango kam ka∙anirangko nipilangenga jeon mikkangchi re∙mikkanganinaba cholrangko nianggen ine party ni dilgipa Deborah Marak aganangaha.
Puone susaanio chegipa ong∙na man∙jaoba a∙doko Congress dol mangrakgipa ong∙kuenga ine Saleng Sangma agandapangskaaha. Unbaksana dolni bilsi bongana sintebaenganiko aro rang∙san sorkari rike biloni tang∙alanikoba janape aganangjolaha.
Deborah Marak Congress dolna kakket ong∙kuenggipa sakantikon mande ra∙e uamangna on∙kange aganangaha jeon ua Dr. Mukul Sangma ni ong∙kataniko janapangaha. Party na gamchatbegipa dilgipa Mukul Sangma aro gipinrangko TMC doloni Congress dolona rimbapilna jotton ka∙na miksonganikoba ua parakangaha. Ia kamko Congress dolni chubatgipa dilgiparangoni ra∙chakaniko man∙genchimosa re∙mikkangna man∙gen ineba ua agandapangaha.
