A∙chikrangni gisepo janggi tangani cholrangko tang∙doatnagita Garo Hills o chalaienggipa petrol pump ni nokgiparangko jatskako kamo rakkichina AHAM dolrang October 4 tariko mol∙molangaha. Gipin jatrangko kam o rakkie koros komianiko ma∙sigenchimoba jatskako rakkiani bang∙a namgnirang aro rokom rikkit gamchataniko AHAM dolrang parakangskaaha.
A∙chikskako kamo rakkianichi tangka paisanigita dakchakanikosan on∙aigija uamangni man∙gipachi nokdangna koros ka∙e a∙doktango jakkalaniara a∙jatangna minggipin namgniko on·anggen ine AHAM dolrang parakangaha. Iachi songsalni manderangna dakchakanikosan on∙aigija joltango songdongenggipa manderangnaba janggi tangani cholko on∙ani ong∙gen ine AHAM ni President Georgeprince Ch. Momin parakangaha. Iani bidingo petrol pump chalaienggiparangko jatskani man∙gniko nigrike dingtangatchina, songsalni namgnina aro manderangni bakrimaniko man∙e chu∙gimik tang∙doanina re∙mikkangchina AHAM dolrang didiangaha.
