Re∙anggipa September jani 23 tariko Nayagaon songoni saksa pagipa aro uni depante sakgniko pulis dolrang ka∙namgija doke sate Phulbari thanao donataha ine u∙iatangaha. Ia mamla a∙a damsao game cha∙na meligrikgijani bidingo ong∙angaha ine koborna parakataha.
Ia ong∙anggipa a∙selni bidingo doka man∙gipa Md Soyod Zamal October 3 tariko West Garo Hills ni SP na badi ka∙doangaha. Uamangni gamgipa a∙ani bidingo maming meligrikgijanirang dongjagenchimoba pulis officer saksa kakketgipa kattarangko ra∙chakna man∙jae a∙a nokgiparangko kragija katta rangchi intekan baksa doka satangaha ine depantegipa Md Intadul Islam aganangaha.
Pulis dolrang uamangko konta sa na batpile sing∙anirangko dakangan baksana ka∙mikenate watataha ine Islam aganaha. Intadul Islam ni pagipa ka∙tong sagipa mande ong∙e adita salrangna skangsa Goalpara ona re∙ange sanna bannaniko dakangaha ineba nokdangni manderang janapangaha. Uamangko a∙a chiani bidingo maming mokordoma ka∙a gri pulis dolrangni doke sate thanani pattoko donataniara niamni a∙palo ong∙jama ineba sing∙doaniko dakangaha.
