Meghalaya Tourism aro Meghalayan Age Ltd ni bakrime Trek Leader Training program ong·atgipao A∙chik chadamberang bakko ra·e skie ra∙aniko dakangenga. Ia programo bakko ra∙na chu∙gimik sak 49 a∙dokni chadamberangko seokaha. A∙dok gimiko seoka man∙gipaoni sak 24 A∙chikrang ia programo skie ra∙na cholko man∙angenga.
Ia certified training programko sal chikkingna ong·atanggen jeon Trek The Himalayas dolrang skie on·aniko dakangenga. Uamang salbongana West Bengal ni Sepaigaon aro dingtang dingtang biaprangonaba re∙ange skie ra∙aniko dakanggen. Training matchotani ja∙mano uamang a∙jani bang∙a tourist biaprango gipin a∙dokoni ba a∙songoni re∙bagiparangko re∙dile biaprangko mesoke aro agantalate on∙anganiko dakangskagen.
