Tura, North Eastern Hill University-o Agri Business Management-ko poraina gital napgipa Naga chatro saksako, Campus ni hostelo adita dongsogipa gitcham chatrorang kragija kamrangko dra·e ka·atanina, a·selo ga·akgipa chatro NEHU Campus ko nirokgipa Dr. Gino Sangma na chitti see u·iataniko dakangaha. Ia a·sel October 8 tarikni wal 1:30 ba 2:00 baji mangni gisepo Arbella Boys Hostel, Chasingre ni ning·o ong·aha ine parakataha.
A·selo ga·akgipani aganani gitade, unsalni attaman uni skanggipa hostelo tuani wal ong·a jeon waljatchio do·ga doktike sak bonga ba sakdok gitcham chatrorang re·bae uko gital chatro ong·ana sing·aniko dake kutturioniko rimongkatangaha. Ua somoio bijoli dongja baksana phone ni light rangko uni mikkango natbrakani a·selo dosi dakgiparangni mikkangrangko name ma·sinagita man·jaha ineba ua janapataha. Uni ja·mano joljol uko bangbanggipa kutturiona rimange an·tangni gimin uamangna English chi aro Hindi ku·sikchi agantalate on·chengchina ge∙etaha aro uamang an·tangtangni phone rangni light rangko natbrake nagande chrokna draataha. Ia a·sel ong·aniko sakgipinna parakjachina uamang ka·mikenatanikoba dakangaha ineba janapataha.
Ia a·sel ong·ani bidingo dosi dakgiparangni kosako kragipa sastirangko on·china aro mikkangchi indakgipa kragijagipa kamrangko ka·angjachina u·iatan baksa a·selo ga·akgipani kosako kakket bichalona ra·bae on∙china chittio janapataha.
