Meghalaya a∙dokni bang∙a biaprango ramarangni namgija obostako nike, sorokko tarina nirok simsakaniko nangenga ine Gambegre MLA Saleng Sangma aganangaha. Ia ramarangko tarina gisiko nanggija donchipaiode manderangni kajina gamgipa tangkarang indin ong∙ramaigen ine ua koborna parakangaha. Ia kragija kamna matnanganiko sawa jako ra∙gen ine contractor aro engineer rangko janapjole Sangma sorkariko sing∙doanga.
Saleng Sangma Garo Hills o rama namgijani biding aganengon Tura oni Baghmara ona re∙gipa, Chokpot aro gipin bakrango ramarangni namjabeaniko janape, ia ramarangko taridape on∙a maming ja∙kurangko de∙a dongkuja ine aganangaha. Unbaksana Shillong songjinmani kona noksik biaprangona re∙ange nion a∙kilokraragipa sorokko nikna man∙gen ine ua parakangaha.
Meghalaya a∙doko pilak karirango baikamgipa sorokko rikanide kattaan dongja ine Sangma agandapangaha. Ramarangko rika cho∙ani kamko namdapatna sorkari dingtang mancha contractor rangko nirok simsakna nanga ine ua mol∙mola gnang aganangaha.
