Tura songjinmao Chandmari rama bibraoni RC Road gittimona re∙gipa biap damsao PHE Department ni a∙ninggita ra∙anggipa chi watgipa siltong nosto ong∙e soroko jokprake donganichi jolni manderangna neng·nikaniko on∙enga. Tura songjinmani manderangna chiko sokatna tarigimin ia siltongni nosto ong∙a jadok mang batahaoba PHE Department ni gita niroke tarie on∙pilanikoba chinga da∙ona dipet man·sokuja ine jolo songdongipa manderang Ku∙rongdik na u∙iataha.
Ia Chandmari bibraoni RC Road gopramona dakanggipa ramako ru∙uta bilsirangni ja∙mano Smart Town project nigita taripile on∙aha. Batanggimin sal somoirango PHE department ni chi siltongrangni nosto ong∙ako nirok sandijani a∙selo ramarang da∙o taraken nosto ong∙aona sokengaha ineba songdonggiparang kobor ra∙timgiparangna u∙iataha. Iachi songdongenggipa manderangnasan neng∙nikako on∙aigija re∙ruraenggiparangba apsankon chagrongna nangenga ineba agandapangaha.
