Re·anggipa October 8 tariko Tura NEHU campus ni Arbella Boys hostelo Agri Business Management department o poraina re·bagipa Naga chatro saksako kragija dake kal·akanina Kohimani Mima Students’ Union (MSU) dol NEHU Turako nirokenggipa manderangni kosako mokordoma ka·angaha ine koborna parakataha.
Naga chatro saksani kosako indakgipa kragija dakaniko jegale aro una kakket bilchalko ra·bana gita MSU aro Angami Krotho bakrime Shillong songjinmao tom·aniko dakangaha. Poraichakram biaprango indakgipa ka·namgijagipa kamrangko dakaniara kraani aro ra·chakna man·gijani ong·a ine MSU ni President Meteiienuo Ngukha suk ong·gijaniko parakangaha.
Unbaksana Naga Students’ Union, Shillong (NSUS) dolrang ia obostani bidingo konta 24 ni gisepo name am·sandianiko dake kakket bichalko ra·bae on·chinagita NEHU ni Vice-Chancellor Prof. Prabha Shankar Shukla na chittiko sedoataha.
