Dengue sabisini giproroanina October 3 oni 12 tarikona porikka ra∙aniko dakanio Meghalaya a∙doko sabisiko man∙gipa chu∙gmik sak 44 gnang aro sabisi man∙giparangoni saksa jimbee saaniko man∙e siangaha ine parakataha.
Health Minister Ampareen Lyngdoh ni agananigitade ia sabisi a∙dokni saliram jolo ong∙batenga, mongsongbate West Garo Hills a∙jani a∙kawe jolrango batrikrikenga ine aganangaha. October 12 tariko saksni manderangko porikka ra∙anio sakgni manderang ia sabisiko man∙giparang ong∙a ineba parakataha.
Dengue sabisi ko man∙gipa Tura Matchakol-oni bilsi 53 ong∙gipa me∙apa saksa Tura Civil Hospital ni ICU o sanna bannaniko dakgenchimoba janggi galna nangaha ine u∙iataha. Sabisini giproroaniko champengna Health department ni gita raka ja∙ku de∙anirangko dakangenga aro songdongenggipa manderangkoba jajrenggija dongna didianikoba Lyngdoh aganangaha.
