Doka damani ko ga·subee dakmesokaniko aro susaaniko October 14 tariko Asanang ni kal∙chakram biapo PRIME Music Incubation Grand Finale ko ong∙atanio nikangnagita man∙angaha. Ia Finale o Garo Hills ni dingtang dingtang biaprangoni doka damani a∙bao changgipa sapgipa chu∙gimik dol 18 jeon sak 65 chadamberang seokako man∙e susaaniko dakangaha.
Ia susaaniko pring 11 bajioni a∙bachengate attamni 6 bajio matchotataha jeon sak 5000 mangnigita manderang nina re∙bae bak ra∙angtokaha. Bon·kame ia susaanio Chegim Durama skanggipa biapko man·e chegipa ong·e gong lakh 4 koros nigita una music video, git chipnagita aro doka damani a∙bao nambata cholrangko on∙anggen. Gnigipa biapo Snam & Kohobodi aro gittamgipa biapo G-Hills Finest man·angskae gong lakh 2.5 aro 1.5 nigita dakchakaniko man∙anggen ine u∙iataha. Una agreba Best Potential Band ni bimingko Cherry Mrong na on·angaha.
Ia tom∙bimonganio Garo Hills ni mingsinggipa dolrang jekai Riprap, Nokpante, Da Suraka aro Nagaland a∙dokni Abdon Mech ni an∙saobee ring·mesokanirangkoba nikangnagita man∙aha. Unbaksana Me∙gong Festival na tarisamsogipa git koba jinmana wate on∙angjolangaha. Ia dalbegipa program ko Durama Association of Arts and Culture (DAMA) PRIME Meghalaya aro Meghalaya Institute of Entrepreneurship (MIE) ni dakchakanichi ia nambegipa programko chu·sokgipa ong·atangaha.
