Rongjeng Regional Unit ni A∙chik Holistic Awakening (AHAM) dol a∙dokni Chief Minister Conrad K. Sangma na a∙jao dingtang dingtang kamrangko ka∙anio chu·sokjaenganina aro chu∙ongjaenganina gronge chittiko on∙angaha.
Rongjengko Civil Sub-Division songgenchimoba chu∙ongagita office nokrang dongjaengani gimin aro office o kam ka·giparang chu∙ongjaengani gimin nanggipa kamrangko ka∙e on∙chinagita chittio janape mol∙molangaha.
A∙jao Jal Jeevan Mission (JJM) ni gita nokantina sale on∙gipa ringani chi piperang chu∙ongjaenganina aro je songrangona pipe rangko sale on∙gimin biaprangona tik ong·e chi jokjaengani bidingo niatchinaba didiangaha. AHAM dolrang iani bidingo changni chang u·iatanirangko dakgenchimoba maming ja·ku de·aniko nikjaenga ine chittio janapataha.
Pradhan Mantri Gram Sadak Yojana (PMGSY) ni rama jal·angrangko tariani bidingoba tik ong·e tarigijanina aro matchotatgija galchipe donani gimin niatchina gitaba janapangaha. Apsan daken NH 42 oni Rongdu Dabit, NH 127B oni Gandual songona aro Chikal Songma songona tarigipa ramako tarianio ru∙utbea somoionaba matchotjaengani giminba janapangaha. Unbaksana Mangsang gita Rongjeng-oni Adokgre-ona tarienggipa ramako 2017 oni tarigenchimoba da∙onaba matchotkujaengani gimin ta·rakkale tarie on∙china gita mol∙molangaha.
Apsandaken Rongjeng Community Health Center (CHC) na Senior Doctor ko rimnapchinaba janape mol∙molaniko dakangaha. Una agreba a∙jani bang·a Lower Primary aro Upper Primary skulrangni nokrang namjaengani gimin aro chu∙ongagita nanggnigipa bosturang dongjani giminba janapangaha. Rongmil ni kal·chakram biapkoba ta·rake taridape on∙china gita AHAM dolrang mol∙molaniko dakangaha.
