West Garo Hills ni Deputy Commissioner ni ge∙etaniko man·e District Administration, Animal Husbandry & Veterinary, Tura Municipal Board, Food Safety Officer, Police Department aro Central force rang bakrime High Court ni ge∙etgimin niam o pangchake Turao aro uni wilwilao donggipa biaprango be∙en palgipa biaprangko nirokangaha. Tura jillani sepangjolo donggipa gittim Dobasipara oni Chasingre giitimrangona re∙ange uamang be·en bitinko palgipa biaprango dongimin niamko ja∙rike palengama paljaengako u∙ina nirokaniko dakangaha.
Ia bakrime nirok sandianiko dakani somoio High Court ni dongimin niamo pangchake be·en bitinrangko nikchrake palaniko aro mongsongbate rongtale rakkie palanirangko ranta ka·chinagita didianiko dakangaha. Unbaksana be·en aro na·tokrangona tampi ba gipin jo·ongrang bilbae ma∙gapna man·janagita net rangko pindape palchina didiangaha.
Turani wilwilao donggipa Dobasipara, Na∙kam Bajar, Kabul Bazaar, Tetengkol, Dermile, Araimile, New Tura, Kasanang, Walbakgre, Megong bajar, Dakopgre, Najing bajar, Ringrey Bajar, Chandmari, Sampalgre Junction, Chitoktak, Rongkhon, Chasingre Farm sepangjol aro Chasingre NEHU gate ona nirokaniko dakangaha.
Ia nirokeaniko dakmitingo bang∙a be∙en palgiparang a∙palo mamingchi pindapa gri palkuenga aro mitam palgiparang ba∙ra bichit aro plastic chi pindape rongtal an·talaniko simsakgija palaniko dakuenga ine u·iatangaha. Tetengkol jolo palgipa saksa wire chi sringgipa bakso o tampirang napna man·janagita simsake palaniko nike gipinrangna namgipa dakmesokani ong·a ine parakataha.
Niamrango pangchake palna ge·etanina bang∙a be·en bitin palgiparang niamko ja·rike palna skaniko mesokangaha. Rongtal an·tale palna na∙tok rangko donchakna bakso aro be·enrangko tampi napna man∙janagita net rangko tarina somoiko on·china badinggiparang mol·molangaha.
High Court ni dongimin niamko ja·rikaniko aro be·en na·tokrangko pala sim·anio rongtal an·tale done palna ranta ka·anirangko mikkangchiba nirokanirangko dakangkugen ine aganangaha.
