Dobu Regional Unit ni AHAM dol, manderangni salantio nanggipa cha·ani ringani bosturangko jakkalna on·gipa tarikna bate bosturangko palna sim·na rakkikugipa jolni dokanrangoniko mijal salni bako nirok sandianiko dakangaha. Dobu Unit ni President Sengbath G. Momin aro Secretary Windon G. Momin ni dilanichi uamang adita dokanrangoniko somoi aro salna batgimin namgijagipa bosturangko palna donkuenganiko rim∙a man∙e adita bosturangko jekai chips, biscuit aro ka∙singipa ringanirangko jakkalna on·gimin tarikna bate palaniko dakenga ine AHAM dol parakataha.
Namgijagipa cha·ani ringani bosturangko palanichi mandeni be·ennigita an∙seng baljoke donganiko nosto ka∙asan ong∙aigija songsalnaba bang∙a neng∙nikanirangko on∙enga ine Tura Central Executive Board ni President George Prince Momin ba raken jegalaniko dakataha. Iasan ong∙aigija mikkangchiba niamko ja∙rikgija dongimin tarikna batgipa bosturangko done dokanrango palaniko jako ra∙e nirokangkugen ine AHAM dol u·iataniko dakangaha.
