South Garo Hills, Chokpot jolni bang·a manderang, skulni chatro chatrirang aro adita bakrimgimin NGO dolrang ku∙monge Dareng chibimaoniko ro·ong bikotaniko dontongatna sorkarinigita nirokatkujani gimin jegalaniko dakangaha. Ia chibimaoniko ro·ong bikote manderangni salantio jakkalenggipa rongtalgipa chiko nosto ong·ataniko baditaba changna dontongatchina u·iatmangenchimoba sorkari nirok simsakatkujanina songni manderang aro bang·a dilgiparang suk ong·jae jegale namnikgijaniko mesokangaha. Bang·a ding·chaogipa manderang baksana pale sim·e cha·giparang dokantangtangko chipe Dareng chibimako nosto ong·aoniko naljokatna aro ripingna tom·anio bakko ra·angaha.
Ro·ongko bikotenggipa nokgipani agananigitade, ua a·ani Nokmani on·ani niamgitasa aro ro·ongrangko lekka pancharang gnangsa bikotenga ine u·iataha.
Ro·ongrangko bikotanichi bang·a buring bolgrimrangko nosto ka·an baksana chiko nosto ong·ataona sokatenga ine jegalaniko dakenggipa manderang aganangaha. Garo Students Union, FKJGP, AYWO, GSMC aro Chokpot Area Vigilance Committee dolrang iani kosako jegala jasni mang ong·engaha aro ia kamko dontongatchina district administration aro state pollution control board na baditaba changna lekka sedoanikoba dakangmanaha ine parakataha.
