Da∙al salni bako New Tura Green Haven-o Meghalaya Board of School Education (MBOSE) ni bilsi 50 gapaniko manianio a∙dokni Deputy Chief Minister Sniawbhalang Dhar mongsonggipa sokgipa ong∙e bak ra∙angaha. Ia maniani miksonganiko “Celebrate the past, embrace the present and rise to the future” ingipa pangchakani kattao maniangaha.
A∙dokni Deputy Chief Minister ni jakchi MBOSE ni nisanko songdoaniko dakange Board ni chu∙sokani aro tangbanganikoba mesokangaha. Unbaksana a∙dokni Education Minister Rakkam Sangma mongsonggipa sokgiparangoni saksa ong∙e MBOSE ni chu∙sokanina aro rakbee kamrangko ka∙enganina mittelpilskaani kattarangko aro nama skaniko on∙angjolaha. Turani Controller of Examination T. R Laloo MBOSE ni a∙bachengo maikai ong·baaniko bakko ra∙gipa sakantinan mesokaniko dakangaha. Ia tom∙anio adita niksenggipa dilgiparang bak ra∙angaha jeon jatni daka rika aro dingtang dingtang kamrangko dakmesokangan baksa bilcham so∙anirangkoba dilgiparangni jakchi dakangjolaha. Unbaksana Garo Hills a∙jani dingtang dingtang skulni chatro chatrirang dakmesokanirangkoba dakangaha. Tom∙anio mongsonggipa sokgipa aro dilgiparangni jakchi Jubilee ni cake koba ratangaha.
Ia tom∙anio MBOSE ni Executive Chairman C P. Marak, Education department ni Secretary Ambrose Ch. Marak aro Jt. Director Regional office MacDonald Marbaniang, dingtangmancha an∙tangtangni gamchatgipa kattarangchi agan ku∙pattiangaha. Rangsakonani MLA Subir Marak, Education department ni Advisor H M Shangpliang, JHADC ni MDC Eveningstar Teron, West Garo Hills a∙jani Deputy Commissioner Jagdish Chelani, West Garo Hills a∙jani Superintendent of Police Abraham T. Sangma, gitcham Chairman Dr. T T P. Marak aro B N Lamare, TMB ni Chairman J D. Sangma, Tura MBOSE ni Director Rikse R. Marak aro adita dilgiparang, skul-college rangni dilgiparang, skigiparang aro chatro chatrirang ia tom∙anio bakko ra∙angaha. Ia tom∙anio adita dingtang dingtang toromni dilgiparang skia poraiako a∙doko gipatani bidingo agan ku∙pattianirangkoba dakangjolaha.