Mikkang bilsi ong·nasienggipa Lok Sabha aro MDC election o susanagiparangko skelgija ka·sine seokangen ine United Democratic Party (UDP) ni President Metbah Lyngdoh October 18 tariko koborna parakangaha. UDP ticketko ra·e susaanio bakko ra·na gisiko nanggiparang iachang bang·a aro da·o dipet sakgni ba sakgittam manderang re·bae susana skaniko uno janapeaha ine Lyngdoh aganangaha. Party baksa apsan ong·e tom·bimongani ja·manosa susanagipako seokna ja·ku de·anggen ine ua agandapangaha.
Dolni gisepo ma·sianigitade gitcham dilgiparang chongmotan Jemino Mawthoh, PT Sawkmie aro HYC ni gitcham President Robertjune Kharjahrin UDP ticket ko man·e susana jotton ka·angen ine mijal salo koborko man·aha. Apsan daken MDC naba da·o dipet maming chanchisoa dongkujagenchimoba, ong·enggipa MDC rang susataina sikaniko janapa dongaha ine UDP dolni President Lyngdoh aganangaha.
