South West Garo Hills, Balughat songo gitalgipa Health and Wellness Centre (HWC) ko mijal salo Mahendraganj ni MLA Sanjay Sangma nokdonggae on∙angaha. Ia program-ona a∙jani Additional DC Y W. Momin, DMHO H. Barman, MDC Akhtar Ali, Balughat ni Nokma aro adita sanna bannanio dangdike on·giparang sokbae bakko ra∙angaha. Indo-Bangla sima ari jolni ia gitalgipa HWC dam 11 songrangko man∙e sak 4000 mang manderangna sanna bannaniko dakna jeon mongsongbate an∙o donggiparangna nirok simsakaniko on·e dakchakanggen ine parakataha.
Ia HWC ko OPD aro Day Care Centre dake jakkalanggen jeon diabetes, cancer sabisi aro an∙chirangko porikka ra∙aniko dakgen, gipin biapni u·i ma·sigiparang baksa golpogrike ku∙pattianiko man∙a amgen ine parakataha. Ian songni manderangna mikrakaniko on∙gipa centre gitaba ong∙gen aro namgipa sanna bannaniko on∙a bimchipgipa kam ka∙giparangko rakkianggen ine koborna parakataha. Mongsonggipa sokgipa MLA Sanjay Sangma, rama namjabee manderangni neng∙nikaniko janape a∙jao tarienggipa ramarangko ta·rakbate kam ka∙atna aro ambulance ko ra∙bae on∙aba ku∙chakangaha.
