Shillong songjinmani U Soso Tham Auditorium o Meghalaya Pradesh Youth Congress (MPYC) dolni tom·anio Gambegre constituency ni Congress MLA, Saleng Sangma bakko ra·angaha. Ia tom∙anio Sangma chadamberangko songsalo ong·enggipa obostarangko nie mangmang dongaigija bimchipe bakko ra·e kam ka∙chinagita didianiko on·angaha. Ia tom·anio politics o bak ra·ani gamchatani bidingo aro songsalo nangchongmotgiparangko manderangna dangdike on·agita chakchike kamrangko ka∙na nanga ine an∙tangni chagrong gimin neng∙nikanirango pangchake Sangma aganangaha.
Dilgiparang chakchikani dongjani a∙sel da∙alo dikdiksa somoina mangba opposition o donge dangdike on∙a neng∙niktoka ineba Sangma agandapangaha. Uandakgipa dilgiparangni opposition o dongna man∙gijani bidingo aganengon, re∙anggipa bilsi bongao an∙tangni opposition o donge chakchike kam ka∙aniko toe aganangskaaha. Bon∙kame ua Congress ni chadamberangko mikkangchi nambate kamrangko ka∙angna bimchipe, on∙kange aro chakchikaniko gisiko don∙e ja∙ku de∙nagita mol∙molaniko dakangaha.
