Shillong Press Club (SPC), Voice of People’s Party (VPP) ni President aro Nongkrem ni MLA Ardent Miller Basaiawmoit ko kobor ra·timgiparangko VPP party ni kosako ong·gijagipa koborrangkosa manderangna sokatenga ine matnangatanina kema bi·china dabiangaha. A·dokni koborrangko parakattimgipani a·bao kamko ka·gipa manderangni kosako ra·chakna man·gijagipa aro ong·gijagipa kattarangko agananina suk ong·gijaniko SPC ni President David Laitphlang parakataha.
Ardent saksa u·i ma·sigipa dilgipa ong·e, a·dokni koborrangko ra·timgiparangni kosako kakketgijagipa koborrangko parakenga aro mongsongbate tangka paisarangko ra·e tol·gipa koborrangko manderangna sokatenga ine agananiara ra·chakna man·gijani ong·a. Unbaksana kobor ra·timgiparang, VPP dolni dakgualanirangkosan jaksi ote koborrango parakatenga ine Ardent ni mande jinmani mikkango agananiko knae aiao inmanani ong·a ine Laitphlang aganangaha.
Ardent ni donmitape agananigita indakgipa ong·gija kamrangko ka·giparang donggenchimode, uamangni bimungrangko u·iatna nanga maina indakgipa kamko ka·aniara Meghalaya a·dokni koborko parakattimgiparangni niamni a·palo ong·a ine SPC dabiangaha. Indake maming sakki gri donmitape agananiara gokani kamsan ong·aigija koborko parakatimgiparangni bimungko ra·onani aro kratcha·ataniona sokatani gimin chu·ongagita talataniko on·china aro kemako bi·china u·iataha. Unbaksana ia dabianiko chu·sokatna man·jagenchimode SPC dingtanggipa ja·kuko de·anggen ineba Laitphlang agandapangaha.
Una agreba kobor ra·timggiparang an·tangtangni kamko ka·na ku·mikchete koborrangko chimongengon manderangni ku·sik gam·aoniko parakatenga ong·ja indiba namgipa ba namgija gimikkon kakketgipa koborko man·esa parakenga ine SPC janapangaha. Ardent ni agananigita uamang dolni namgipa koborrangkosan parakatna nangaigenchimode uni donmitape agangipa manderangsan uamang dolni mikkangchi ong·nasienggipa tom·anirangko parakatna nanganio ga·akenga ineba SPC aganangaha.
