A·chik Literature Society, October 21 tariko Garo Department, NEHU Tura Campus, baksaba nangrime Regional Writers’ Meet ko Christian Girls’ Higher Secondary School, Tura-o ong·atangaha. Ia tom·bimonganio Mendipathar College, University of Science & Technology (USTM), Don Bosco College, Tura, Don Bosco College Higher Secondary School, Tura, North-Eastern Hill Universityni Garo Department, MSW, ICFAI University, Tura Government College, Durama College, Miriam Russel Women’s College, Tura, PASF-Abong Noga College, Tura-oni chatro-chatrirang bak ra∙angaha. Ia tom∙bimonganio bak ragipa college aro skulni chatro chatrirang uamangni A∙chikkuchi segimin poedorangko poraie mesokangaha. Ia poedorangni ja·pangrangara ma·a-paani dedrangna ka·saani, seng·ani andalako ammani, a·songtangna ka·saani, ku·tangna ka·saani, daka-rikani, janggi tanganio rasong chaani aro gipinrang ong·a.
Kroshnil D. Sangma, saksa ki·tap seanio niksenggipa uni poedo Chera Solako poraia baksa, da·ororo Garo Hills-o donggipa Lower Primary Skulrango ong·enga obostarang aro neng·nikanirangni bidingo seako poraiaha. Hiracliush M. Sangma minggni poedorangko poraiaha. Una agreba A·chik Literature Societyni gipin Executive Member rangba an·tangtangni poedorangko poraiangaha.
Ia programo, A·chikkuo poedo aro gipin bimangrango seaniko namdapatna nanganirangko mesoke, ALS ni President Prof. Caroline R. Marak, NEHU Tura Campus Garo Department ni HOD Dr. Jacqueline R. Marak, Dr Angela W. Ingty, Prof Fameline K. Marak, Dr. Dokatchi Ch. Marak, Venybirthseng Ch. Marak, Dr. Jobillyne D. Shira, Dr Colnat B. Marak aro gipinrang talate on·angaha.
Bilsini gisepo poedo aro gipin bimango seaniko skie on·na workshoprangko ong·atna nanganikoba chanchirimangaha. Ia Regional Writers’ Meetko ong·atani miksonganiara chadamberangko poedo, dakmesokani, ku·akmao sena didina aro A·chikkuchi sea-jotaniko mikkangchi chubata gadangona ra·dona ong·a.
