A∙songo til∙ek an∙chaani batroroenganiko komiatna ma∙mong sorkarinigita kam ka∙engon, mejal salni bako Mumbai Andheri jolniko pulis dolni am∙sandianiko dakanganio saksku me∙chikrangko damsa be·en bimangko nitoatna tari-til∙ongchakram biaponiko jokatnagita man∙aha. Ia saksku jokatako man∙giparangoni saksnide Northeast ni dintang dingtang a∙dokrangoni ong∙a jean, sakbri Manipur a∙jaoni, sakgni Mizoramoni, saksa Meghalayaoni, saksa Kolkataoni aro saksa Lucknow songjinmaoni ong∙a ine ma∙sina gita man·aha.
Tari-til∙ongchakram biapko nirokgipa Chandrakant ko pulis dolrang ia am∙sandiani somoio rim∙nagita man∙aha aro biapni nokgipa Atul Dhivar ko kate dongenganiko pulis dolrang am∙sandianiko dakangenga ine koborna parakataha. Ia til∙ek an∙chaani kamko chalaienganio Mumbai ni adita dal∙dalgipa manderang jak donga ine chanchichipe am·sandianirangko dakangkuenga ine police dolrang koborna parakataha.
