Re∙anggipa June 14 tariko PMAY-G Mela ko Samanda C&RD Block-o ong∙atangaha jekon East Garo Hills ni DC Vibhor Aggarwal ni jakchi oprake on∙angaha. Ia program-o sak 500 PMAY-G ko man∙gimim manderang baksana VEC ni President, Secretary aro wilwilao songdongenggipa manderang bakko ra∙angaha. Ia program-ko ong∙atani miksonganiara manderangna Ma∙mong sorkari-ni ge∙etgimin gita man∙gimin nokrangko June 30 tariko matchotatna nanga ine agangiminko manderangna u∙iatna gita ong∙a, aro on∙gimin tangkarangko jakkale nokrangko name rikchina gita mikrakatangaha.
Ia program o dingtang dingtang sorkarini department-rangba bakko ra∙angaha jekai Medical aro Social Welfare departmentrang, ia scheme ni gimin mikrakataniko on∙angaha. Ia programme-o job card donggiparangnaba aadhaar ko se∙gataniko dakangaha aro aadhaar ko se∙gatchina gita manderangko didiangaha. National Rural Livelihood Mission ni dingtang dingtang gadango kamko ka∙enggiparangba bakko ra∙e insurance scheme rangni gimin talatan baksana gitalgipa se∙gataniko dakangaha. Unbaksana North East Small Finance ba bakko ra∙e gitalgipa bank account rangko kulianio dakchakaniko on∙angaha.
