Re∙baenggipa Lok Sabha aro MDC election na susaanio Voice of the People Party (VPP) dolrang National People’s Party (NPP) dolna maming neng∙nikaniko ra∙baani dongjawa ine Education Minister Rakkam Sangma aganangaha. VPP ge∙sa gitalgipa dol ong∙ani gimin manderang uamangko ra∙chaknagita adita somoirang nangkugen aro mikkangchi bang∙a neng∙nikanirangko chagronganggen ineba Sangma aganangaha.
Political dol ong∙mangmange, election o tole ku∙mitchetanichi chegipa ong∙na man∙ja maina manderang uamangna kamchi jaksrame ka∙e on∙anikoba nanga ine Rakkam Sangma kobor ra∙timgiparangna aganangaha. VPP dol matnanganiko komiate sorkari baksa kamrangko namdapatani bidingo ku∙mongrimna nanganikoba aganangjolangaha. Meghalaya ge∙sa chongipa a∙dok ong∙e tangka paisanigita neng∙nikanirangko man∙ani gimin ma∙mong sorkari baksa melina sapgipa political dol kosa nanga. Unbaksana a∙dokni manderang political dol rangni changa sapani aro kam ka∙anirangkosa nibata ine Sangma agandapangaha.
