Ru·utgija salrangna skang A·chikkuni sea jotaniko aro aganritinganiko ripingna a·bachenggipa gital Ku·mandi Kotok dolrang gnigipa tom·aniko ong·atna miksonganiko koborna parakataha.
Ia tom·aniko Extension Training Centre, Tura Dakopgre gittimo November jani 4 tariko 11 bajimango ong·atgen ine parakataha. Re·anggipa chango skanggipa tom·aniko ong·ate uamangni dolni dikdiksana ‘Ku·tangni Matgrik, Jatni Danil’ ine dongipa bimingko ‘Ku·mandi Kotok’ ine mingjitangskaaha. Uamangni dilgiparang baksa adita sing·anirangko dakon mikkangchi dakna miksongani aro dolni nama re·mikkangani bidingo agantalate on·angaha. Ia gnigipa changna uamangni tom·anio sakanti bak donggipa manderangko ku·tangko ripingna kam ka·anio chanchirimna re·bae bakko ra·epachina dingtangmancha Ku·mandi Kotok dolni dilgiparang mol·molataha.
