Mijal salni bako a·dokni Cabinet tom·anio 2021 bilsini Meghalaya Excise Amendment Rule ko dingtangataniko Cabinet ra·chakangaha. Iako dingtang mancha a·doko man·enggipa bosturangko bak daktaie Excise department na gong crore 50 tangkarangko bilsiprako man·dapaniona sokatna miksonge ra·chakangaha. A·doko tarigipa bosturang bang·bea jekon nambate kajinako man·dapna uarangko bak daktaiaha. Da·o ia ja·kuko de·anichi bak bonganipal bak dok ong·skagenok ine Cabinet Minister Marcuise Marak parakangaha. Da·o dipet Excise department ni man·enggipa kajina gong crore 350 ong·enga jean 15 percent na baridapna ka·dongenga ine Marak agandapangaha.
Sing·anina aganchakengon, batanggimin bilsi bongani gisepo gong crore 1200 mang kajinako man·aha jekon talbate u·ina nangkuenga ine department ni Commissioner aro Secretary, Sanjay Goyal parakataha. Covid na skang gong crore 200 kosan man·a amaha jean bilsi 4 ba 5 ni gisepo excise ni kajina man·anio dingtanganiko nikaha ine Goyal janapangaha. Kajina man·dapani bidingo ja·ku de·anirangko sing·on, bosturangko bak daktaie dingtangatanian mongsonggipa ja·ku de·ani ong·a ine Goyal aganangaha.
Sepangbatgipa a·dokrangni bosturangko bak dakaniko uamang poraimanaha aro damni kri ma·ekatanichi man·gnirangko ra·bana amaniko nigrikmanaha. Unbaksana iako dakanichi 15 percent mangna kajina man·dapanio dingtanganiko ra·bagenchimoba Maximum Retail Price (MRP) o inditana nangchakejawa jean 9-10 percent san ong·ainaba donga ine Goyal parakangaha.
