2024 bilsio Lok Sabha pu∙onani ong∙nasienggipana NPP tarisamsoenga aro su∙sanasigiparangni bimingrangko ia jani gisepo parakanggen ine Meghalaya NPP ni gital President Prestone Tynsong aganangaha. TMC ni dilgipa Umroi ni MLA gitcham George B Lyngdoh NPP dol baksa bakrimna miksongani gimin sing∙on, Lyngdoh ko party ona rimnapna uo re∙ange sing∙na nangtela ong∙ja ine Tynsong aganangaha. Uasan ong∙aigija bang∙a susanagita gisiko nanggiparang NPP dolming baksa nangrime kamrangko ka∙na namnike re∙batokenga ine ua agandapangaha.
Agatha K. Sangma Tura o MP ong∙enga jekon uamang ong∙enggipa MP ko Turani biapna susaataianiko aro gitalna ticketko on∙ani bidingo dolni niamrangko ja∙rikesa chanchirimanggen ine Tynsong parakangaha. State Level Committee, District Committee rang aro Block Level Committee rangko taripilanian ia pu∙onanina uni mongsonggipa miksongani ong∙gen ineba ua aganangaha. Autonomous District Council (ADC) pu∙onaninaba uamangni dol manderangko sandiangkuenga ine Tynsong parakangaha.
