Jal Jeevan Mission-ni ning∙o a∙dokni Chief Minister Conrad Sangma ‘Water Smart Kids Meghalaya’ campaign ko a∙bachengate on·angaha. Ia campaign-ko oprake on·ani salo PHE Department ni Minister Marcuise N. Marak, Commisioner and Secretary cum Mission Director Syed Md. A. Razi, Chief Engineer B. M. Lyndem aro gipin dal∙dalgipa officer-rangba dongpae bakko ra·angaha.
Bi·sarangna ia campaign ko a·bachengatanichi skulni chatro chatrirangna chiko ripinggiparang ong·na dingtang mancha didianiko on·a miksonge re·mikkangenga. Ia campaign-o, chiko ripinge rakkiani gamchataniko, simsake jakkalna nangani aro chiko jakkalsretaniko champengna skulo bi·sarangna skie on·anggen.
Ia programni bako ‘Water Guardians : Strengthening Sustainable Communities Campaign’ o bak ra∙e chegipa songrangna Chief Minister ni jakchi boksisrangkoba sualangjolaha. Nambate dakgipa Ri-Bhoi a·jani Lumshyiap song skanggipa gadangko man∙aha. Gniggipa gadangko West Garo Hills ni Darechikgre song man·angaha aro gittamgipako Dura Kantragre song cheangskaaha.
