Adita salrangna skang chatro saksa ripengska baksa bike sale re·angmiting somoio gari baksa Uttarakhand-o a·sel ong·anio bilongbee saknaaniko man·e janggiko gimaataha ine koborna parakataha. Sianggipa chatro ara North Garo Hills a·jani Cherikam D. Sangma ong·a jean Dehradun ICFAI University o poraiengachim ine ma∙sina gita man∙aha.
A·sel ong·a bakan uko Dehradun Mahanta Indresh Hospital ni ICU o done sannaniko dakangani ja·mano nambate sannagita Delhi ni AIIMS Trauma Centre ona rimange sannaniko dakengachim. Bilongbee saknaaniko man·ani a·selo ua mijal salni bako janggi galaha ine parakataha.
All Dehradun A·chik Students’ Association (ADASA) ni President Teseng Ch. Sangma ni agananigitade uamangni gita aro adita chatrorang Cherikam ko Delhi ni AIIMS-o sannagita tangka paisanigita dakchakangaha. Una agreba a·dok ni skotong Minister Conrad Sangma ba dakchakaniko on·angaha ine janape aganangaha.
