South Garo Hills a∙jaona re∙gipa NH-62 ramarang namjabeanina aro tarigija galchipanina Garo Students Union (GSU) Karukol unit dolrang jegale da·al salni bako re∙jomaniko dakangaha. Uamangni janapatani gitade ia ramako ru∙uta bilsirangonin tarigija galchipe donani a∙sel salantio re∙ruraenggipa a∙jani manderangna namen neng∙nikaniko on∙enga ine u∙iataha.
Ia ramagitan salantio nangchongmotgipa cha∙ani ringanirangko aro jakkalna nanggipa dingtang dingtang bosturangko salruranagita jakkalenga. Indake ong∙genchimoba ia ramako jako ra·e kam ka∙enggipa departmentni gita ru·uta bilsirangna nirokjaha aro taridapanirang dongjaha ine GSU Karukol unit ni General Secretary Francis R. Marak parakataha. Una agreba Karukol jolo bang·a PMGSY ramarangkoba matchotatna dongimin somoi badepilahaoba da·onaba matchote on∙gijanirang bang∙en dongkuenga ine ua janapataha.
A·jao aro wilwilao donggipa biaprango jako ra·e ka·enggipa department ni indake simsakgija kam ka∙anina jegalaniko dake songni nokni namgnina kam ka∙angna mangsonge ia re∙jomaniko dakaha ine uamang parakataha. Unbaksana ia galchipe tarigija donenggipa ramarangko jako ra·e kam ka∙enggipa department ko ta∙rake nirokatchina mol∙molanikoba dakangaha.
