Bakrimgimin NEHUTA, NEHUNSA aro NEHUSU dolrangni Joint Action Committee (JAC) rang uamangni mingsku dabienggiparangni bidingo NEHU ni Vice-Chancellor Prof. PS Shukla baksa gronge golporimna tik ka∙angaha. JAC ni memberrang conference hall-o VC baksa da∙alo grongrikaniko dakanggen ine JAC ni Chairman Prof. Lakhon Kma u∙iataha. VC baksa golporimani ja∙mano office ni a∙palo jinma tom∙dake chanchirimanio pangchake mikkangchi ja∙ku de∙ani bidingo golporimanggen ine Kma aganangaha. Pangkimgipa ja∙kurangko de∙ja dipet jingjengataniko dakangkuaigen ine ua agandapangaha.
Uamangni mingsku dabianirangara technical officer ko kamna niamgri rimnapgiminko bakan ra·galchina, Statutory officer rang aro University Engineer rangko rimnapchina, University o nosto ong·angenggipa sanna bannaniko dakgipa biaprangko taridapchina, skigiparangni kamrangko olgrokatchina, NEHU ni niam retiko gital dake parakataichina, NEHU ni official website o niamrangko nambate u·iatna, convocation programko bilsianti ong·atna, porikkao mark rangko on·anirangko namdapatna, NEHUSU ni seokgimin member rangko Academic Council o bak ong·atchina aro poraia skiani gadango ja·manchakgipa biaprangna a·kanggiminrangko block aro songnigita nipiltaichina janapanggiminrang ong·a.
