Chang 5 gipa Meghalaya Games ko ia chang Tura songjinmao January 15 oni 21 tarikona sokachakaniko dakna tarisamsonagita WGH a·jani DC Jagdish Chelani pilak daito-o ga·akgipa department rang baksa da·alo tom·e chanchirimangaha. Ia kal·susaaniko skanggipa changna Tura songjinmao nokchakengani gimin, DC dingtangmancha officerangko uamangni kamrangko name jako ra·e aro bakrime antisana susaatenggipa ia Meghalaya Games ko chu·sokatchina didiangaha.
Songjinmani wilwilao dongenggipa Development Committee rangko bakrime rongtal an·talataniko aro gittim antio sildapatanirangko dakchinagita adita tangkarangko chamatgen ine DC u·iatangaha. Ia kal·susaanina tarisamsoaniko chu·gimik nirok simsake kamrangko ka·china DC ni jako pakwataha jekon da·o ua pilak department rang baksa chanchirime tarisamsoaniko dakna ja·ku de·angenga.
