Ku∙mandi Kotok dolrang gnigipa changna tom∙bimonganiko re∙baenggipa December jani 7 tariko Extension Training Center, Dakopgreo pring 11 bajioni ong∙atna tik ka∙angaha ine dolni General Secretary Arcosh M. Momin parakataha. Batanggimin chango gelna man·gijagipa a·selrangko chagronge tom·aniko dontongatna nanggenchimoba, ia chango changsatai uamang pilak skigiparang, chatro chatrirang, lekka serakgipa aro bang·a gisiko nanggiparangko tom·anio bak ra·pachina mol·molataha.
Ia changgnigipa tom∙anio Ku∙mandi Kotokni bimingko ra·chakangan baksa dolni miksongani, mikkangchina nikjumangsoani, dolni noksa aro nishan ko ra∙chakanggen. Una agreba Ku∙mandi Kotok dolni gitko jinmana ring∙mesokanggen aro chu∙gimik Executive committee koba songangjolgen ine parakataha. Ku∙mandi kotok dolrang jolni kri agangipa A∙chikkuni ku∙bipekko tangkamatna sea jotaniko nambatatna, ra∙chakgimin A∙chikkuko seanio aro agananio ripingna miksonge ja∙ku de∙angenggipa ong·a.
