Tura Diocese ni Golden Jubilee ko Don Bosco Mini Stadium-o bon·kame manie matchotatna tarisamsoahani gimin re∙baenggipa December 2 tariko Chandmari o Sonibar rikit anti cha∙aniko dontongatchengna Tura Municipal Board ni Chief Executive Officer u∙iatangaha.
Ia salo anti cha∙ani sal ong∙genchimoba pale sim∙e cha∙giparangko an∙tangtangni palani bosturangko ra∙bajachinagita TMB dingtang mancha mol∙molataha. Unbaksana Chandmari jolo songdongenggiparangko ramarangko bangbang ong∙e rakkichina didiataha. Ramarangko joke donanichi gari gorarang re∙ruraanio maming neng∙nikani gri re∙nagita man∙gen ine mol∙molangaha. Una agre cha aro mi dokanrangkoba ramasamrango rikjachina champengataniko dakangaha.
