Garo Hills o Mid Level Health Providers (MLHP) ni kamrangna rimnapaniko dakkujaengani gimin NGH Rongrongni MDC Rinaldo K. Sangma, a·dokni Health Minister Dr. Ampareen Lyngdoh na ta·rakkale nirokate kam ka·atpachina memorandumko on·e mol·molataha.
Sangma uni chittio, batanggimin salrango Garo Hills ni a·jarango MLHP ni kamrangna maming u·iata donggija sak 41 gipin jatrangko kamna rimnapaniko changsatai Health Minister na janapataha. Iani a·selo Garo Hills ni manderang ma·sirikjae kamna galrikna chol ong·jaha ine ua u·iataha. Re·anggipa November 12 o Garorangko rimnapaniko daktaina ine walk-in-interview ko ong·atgenchimoba da·ona kingking kamrangko gapata dongkuja aro department iani bidingo ku·saba agana dongkuja ine Sangma agandapangaha.
