South Garo Hills ni bakrimgimin NGO rang, AYWO Nongalbira southern zone aro GSMC southern zone Baghmara da·al salni bakko a·jani DC Shivansh Awasthi na Bangladesh a·songchi niamgri chini salaniko don·tongatchina didiate chittiko see pawatangaha.
Kakketgipa koborrangko man·soanigitade chinirangko sepangbatgipa a·dok Assam-oniko gate Baghmara gita jolni manderangko jakkale walsaon gari bol 30 oni 40 mangrang niamgri salaniko dakenga ine NGO dolrang parakataha.
South Garo Hills a·jako napake chini salaniko re·anggipa jaoni da·onaba dakengkua aro uamang sorkarini nanggipa lekka pancharang donggija niamgri Bangladesh ona badingangenga ine NGO rang janapataha. Indake sorkarini dongimin niamrangko pe·e aro an·tangtangni man·gnina bading chiwalaniara sorkarini kajina man·aniko gimaata ine uamang parakangaha.
Ia niamgri chinirangko Bangladesh ona salaniko dakangkuaiode mikkangchi sorkarina aro a·dokni manderangna dal·a neng·nikani ong·naba gnang ine DC ni jako chittiko pakwate dontongatchina mol·molangaha.
