Garo Hills o mande aro mongmarangni janggi tangrimbaaniko namdapatna, chagronggrike a·sel ong·anirangko champengsona man∙agita Darwin Initiative Biodiversity Challenge Funds ni dakchakaniko man∙e Aaranyak aro British Asian Trust, WGH ni damsni songrango solar light rangko songe on∙angaha. November 23 tariko Assam aro Meghalaya a∙dokni sima-ari jolo dam 15 solar light rangko songangangaha ine koborna parakataha. Ia kamko chu∙sokatna songtangtangni Village Champions dolrang, Aaranyak oni Nipil Chakma, Subhas Rabha, Rupam Goyari dingtangmancha Anjan Baruah ni dilanichi matchotatna man∙aha.
WGH a∙jani ning∙o solar light rangko songe on∙anggipa songrangara Borogobal, Darenchigre, Bondukmali, Bordubi, Photamati, Jamdamgre and Kharsingdab rang ong∙a jeon ia song damsnio songdongenggiparang sak 533 manderang gnang ine parakataha. Ia solar light rangko mongsongbate andalgipa biaprango mongmarangko niksona man∙agita aro songni manderang a∙selrangoni naljoke dongna man∙agita songe on∙angaha.
