Manderangko sanna tarigipa sam Albendazole tablet rangko Assam, Analyst Regional Drug Testing Laboratory-o porikka ra∙ani ja∙mano ia samrangko jakkalna namgipa ong∙ja ine West Garo Hills ni Inspector of Drugs u·iatangaha. Ia samrangko manderangko sannanio jakkalpajachina aro sanchakramrango kam ka∙giparang sagiparangna sualpajachina dingtangmancha Medical Officer rangko didiangaha. Sanchakram a∙damrango dongkuenggipa samrangko nipiltaie koborrangko sokatchinaba ua mol∙molangaha.
Jakkalna namgijagipa ine u·iatgimin Albendazole samrangara ia bilsini January jao tarigipa jean 2025 bilsini December jaona jakkalna tarigimin ong·a. Ia samko Ms/ Maxter BIO-GENEICS tariaha jekon da∙o adita nanggiparangko porikka ra∙e nianio jakkalna namgijagipa ong·a ine ma·sinagita man·e jakkalpajachina parakataha.
