Sombar salo Manipur a∙dokni watatako man∙gipa dilgiparang a∙songni Defence Minister, Rajnath Singh-ko a∙songni skotong songjinma Delhi-ona re∙ange grongenba Kuki bobil dol gittamni kosako ra∙gatgipa Suspension of Operation (SoO) ko rang∙gitik ra∙galpilchina gita dabianirangko dakaha. Manipur a∙dokni Speaker-Thokchom Satyabrata Singh-ni dilanichi, unbaksa adita BJP ni Minister aro MLA rang aro sorkari baksa apsan chapgipa National People Party (NPP) ni MLA rang, chu∙gimik sak 23 dilgiparang re∙ange a∙dokni obostarangko talate on∙angaha.
Dilgiparangni Rajnath Singh-ko sing∙doani gitade katbrange dongenggipa bobil dolrangko a∙tiptangona rimbapilna ja∙ku de∙ani kamrangko ka∙angchina gitaba mol∙molangaha. Bobil dol dake chakatenggiparang chong∙motan Kuki National Army (KNA), Zomi Revolutionary Army (ZRA) aro Kuki Revolutionary Army (KRA), Manipur sorkarini aro ma∙mong sorkarini Tripartite Suspension of Operation (SoO) ko soi ka∙ani ja∙mano sak 2266 Kuki bobil dolrang a∙tiptangoni katbrange dingtang dingtang a∙tiprango katnape dongenga ineba janapangaha.
