East Garo Hills a·jao Eco-tourism project ni kamko ka∙na chamatgimin tangka gong 14.39 crore ko jakkalsretanina aro kam matchotaha ine lekkao tol·e mesoke segate, kamko matchotgija galchipe donenga ine Niksamso Garo Community Organization (NGCO) dolrang koborna parakataha. 2017 bilsio chamatgimin ge·sku project rang somoio matchotani sakkiko lekkao mesokgenchimoba chong∙mot bimangkode kam matchotgija galchipe donenga ine janapataha. Je project ko kam ka∙na tangka gong 14.39 crore ko chamataha, ua kamko ka∙chakatani ja 18 ni gisepon kamko matchotnagita segate on∙ani gisepon galchipe donenganiko niknagita man∙enga ine parakataha.
Ia kamrangni bidingo NGCO RTI ka∙doanirangko dake, tangka gong 13.61 crore mangko 10% ba 15% mangni gita mangmang kam ka∙e contractor ni bimungo bikote ra·anirangkoba niknagita man·aha ine u·iatangaha. NGCO dolnigita Gittokgre Eco-Tourism biapona re·ange nianio uamang rikenggipa biaprango buring dikpilripe donganirangkoba nikna gita man·angaha. Ia obostarangko nike kamrangko a·bachengatainagita kragipa aro ong·na amgijagipa ong·a ineba uamang janapataha.
