South Garo Hills a·jao gital koelarangko niamgri bikote Nongalbibra, Jadigittim, Garegittim, Darangdura, aro wilwilao donggipa biaprango ra·bae dane donenganina songdongenggipa saksa, unbaksana Rongara-Siju ni gitcham MLA Rophul S. Marak, Nongalbibra pulis thanao badi ka·doangaha. Meghalaya a·doko niamgri koela bikotani aro salaniko Supreme Court aro High Court dontongchina ge·etmangenchimoba South Garo Hills o ia kamrangko ka·angkuenga ine Marak parakangaha.
2020 bilsio niamgri koela bikote salani bidingo Meghalaya High Court o badi ka·doanggiparang name matchotsranggijagipa minggni dongengkua, aro bang·a gipin badi ka·doanirangba chu·sokugijagipa dongkuenga ine Marak parakangaha. Name matchotkugijagipa badi ka·doanirang dongkuengoba niamgri koela bikotani aro salaniko Nongalbibrao unbaksa wilwilao donggipa biaprango dontongatna maming ja·kurangko de·kujaenga ine Marak janapangaha.
Nongalbibra jolni wilwilao niam gri koela bikotaniko aro salaniko nirokate, dosi donggipa manderangko am·sandie raka sastiko on·china Marak uni badi ka·anio didiangaha.