Da·al saloni a·bachengnagipa Me·gong Festival ko dontonggija mikkarang waani a·selo December 8 tarik Sukrobar salo a·bachengatna tik ka·angskaaha. Re·anggipa salonin Garo Hills o mikkarang wana a·bachengaha aro dontonggija waaniko nikangkuna man·enga. Mikkarang wae manianiko nosto ong·atgenchimoba pala sim·aniko dakenggipa dokanrangko da·alonin kulie on·angaha aro gipin maniani bakrangko manderangna ong·atangaha.
WGH, DC Jagdish Chelani kobor ra·timgiparangna aganengon, manianiko knalona ra·doatgenchimoba maniaona re·bagipa manderangna da·alonin kulie on·angaha ine parakangaha. Manianiko skanggipa salo oprakanio mingsinggipa Parikrama dolrangni git ringani aro gipin dolrangba dakmesokani donggenchimoba mikkarang waani a·sel dontongatna nangaha. Da·al salo git ringna dongipa dolrangko knal salni programona donatskaaha ineba u·iatangaha.
