Batanggimin somoio East Jaintia Hills oniko koela e-auction ka·gipako sepangbatgipa Dawki ramako gele South Garo Hills ni Gasuapara LCS gita Bangladesh-ona salaniara kragripa aro bebe rana amsokgijani ong·a ine gitcham MLA Rophul S. Marak a∙dokni Directorate of Mineral Resources (DMR) ni Director-na chitti sedoangaha. Unbaksa jemangan koela e-auction ka∙anio bakko ra∙ani chusokgipa ong·e ia kamko ka·engachim uamang an∙tangtangni koela bading chiwalani lekkako sakkina on∙jaha aro uamangni gamrangni gimin maming talataniko on∙anirangba dongja aro ian don·gimin niamko pe·e kam ka·ani ong·a ine Marak chittio janapangaha.
Supreme Court ni ge∙etgimino pangchake, niamni a·palo koela cho∙aniko aro bading chiwalaniko champengnagita nangan baksana niamgri koela cho∙aniko aro bading chiwalaniko champengnagita pilak koelani bidingo see rakkigiminrangko nipiltaie ba am·sandianiko dake nanggipa ja·kurangko de∙na nanga ineba Marak janapangaha.
Indakgipa obostarangoniko champengsonagita a·doko niamgri koela cho∙aniko aro bading chiwalaniko Supreme Court aro National Green Tribunal (NGT) dontongatangaha. Indake niamgri cha∙ue koela cho∙aniko aro bading chiwalaniko dakgiparangko am·sandie indakgipa kamrangko a∙doko dontongatna nanga ine Marak chittio janape mol·molataha.
