Mijal salni bako, Congress dolni dilgipa Saleng Sangma, a∙doko bang∙a nanganirangko aro neng∙nikanirangko nichenggija dal∙dalgipa manianirangko ong∙ate sorkarini tangkarangko jakkalani bidingo matnanga gnang aganangaha. Indakgipa manianirango man∙e cha∙giparang katchabee an∙senga, jeon cholgrigiparangde neng∙nikanirangko chagrongangkuna nanga ine Sangma aganangaha. A∙doko poraigipa chatro chatrirangni scholarshiprangko man∙kujaenga, skigiparang dormaharangko man∙a nangenga aro mitam departmentrangna DA rangkoba on∙kujaenga ine Sangma agandapangaha.
GHADC o kam ka∙giparang ja 30 na bate dormaharangko man∙kujae ia bilsini krismasko kusi ong∙pana chol man∙jawa ine Sangma neng∙nikanirangko parakangaha. Sorkari indake dal∙dalgipa manianirangkosan ong∙atna chanchiaigija, a∙doko ong∙enggipa obostarangko sakantinan chanchie nigrike apsandake kamko ka∙na nanga ine Sangma aganangaha. Me∙gong Festivalko ong·atanichi Garo Hills o tourism ni a·bao tang·doatna dakchakani ong·ani bidingo sing·aniko dakon, salsa salgnina manianichi Garo Hills o tourismko tang∙doatna man∙jawa ine Sangma aganchakangaha.
