Re·baenggipa 2024 bilsini January 15 oni 20 tarikona Meghalaya Games ko Tura songjinmao sokachaknasienggipana gong 23 crore tangkarangko jakkalna tik ka·angaha ine Sports Minister Shakliar Warjri da·al salo u·iataniko dakangaha.
Ia kal·susaanina ta·raken tarisoaniko dakenga aro somoina skang matchotatgen ine Warjri aganangaha. Iako ong·atanichi a·dokni chadamberangna dingtanganiko ra·bana aro kal·susaani a·bao uamangni changa sapaniko mesokangnagita man·angan baksa mikkangchi kalsusaani a·bao a·songo aro a·gimiko niksengatnagita cholko man·anggen ine Warjri ka·dongataniko aro miksonganiko talatangaha.
Gong 23 crore tangkarangko jakkalanio sorkari gital rika cho·anirangko dakengama ine sing·anina, rikgimin kal·chakram biaprangko jakkalangan baksana sorkari cha·a ringani, re·a doani, dongchakram biaprang aro dingtang dingtang nanganirango kal·susanagipa chadamberangna name tom∙tome chu·sokatnagita miksongenga ine Warjri aganangaha. Ia Meghalaya Games 2024 o ming 22 dingtang dingtang kal·susaanirang dongani gimin tangka paisarangko jakkalnagita bang·en nanggen ine Warjri aganangaha.
