Da·al salni bako Meghalaya a·dokna 10 Bed ICU Project aro Tele-ICU Hub ko a·bachengatnagita skotong Minister Conrad Sangma oprake on·angaha. Ia projectko niksenggipa private organization jekai INFOSYS, Khoasla Venture, Karuna Trust, 10BedICU.org, HDFC Bank Parivartan aro eGov.Foundation baksana a·dok sorkarini bakrime bimchipe jotton ka·e kam ka·anichi a·bachengatnagita man·angaha ine parakataha. Ia oprake on·ani somoio Health & Family Welfare ni Minister Ampareen Lyngdoh, Chief Secretary D.P. Wahlang, Health & Family Welfare ni Principal Secretary Sampath Kumar, health officialrang aro projectko chu·sokatanio bako donggiparang sokbae bakko ra·angtokaha.
A·doko sanna bannani a·bao dingtanganiko ra·banagita aro nambata sanna bannaniko on∙agita ia projectko a·ja antini hospitalrango a·bachengatanggen. A·doko ga·nanggijagipa biaprangni a·selo neng·nikanirangko chagronggenchimoba, ia project ko ra∙baanichi sanna bannanio jakkalna nanggipa bosturangko on·e dakchakanggen. Ia projectko tang·doatnagita manderangni janggiko naljokatatna jakkalgipa bosturangko dam 12 a·jani hospitalrango dongen aro Tele-ICU Hub rangkoba a·dokni gimik a·jani hospitalrango nangrimatgen. A·dokna ian dal·gipa chu·sokani ong·anggen maina a·dokni noksikbatgipa biaprangnaba sanna bannani a·bako tang·doatan baksana manderangni gamchatgipa janggirangko naljokatna dakchakani ong·anggen ine u∙iatangaha.
A·dok sorkari manderangni an·seng baljoke donganina aro nambatgipa sanna bannaniko on·a miksonge chamgimin tangkana 8% mangna batpile tangka paisarangko jakkalenga ine skotong Minister Conrad Sangma parakangaha. Una agreba NGO, Private organization, on·gilaniko dakgiparang aro sakanti manderangko ia projectko chu·sokatnagita bakrime kamko ka·angnagita Sangma didiangaha.
